maudlin

Ansarap din maka-tsamba sa panaginip-sa-pagtulog ng panaginip-sa-paggising. Sa ilalim ng buwan at mga bituin, sa ilalim ng kapirasong kumot, sa likod ng talukap ng iyong mata naka-tanghal ang palabas ng mga mithiin mo at ikaw ang nag-iisang tagapanood, ang tanging nakakaintindi.

Ngayong paskong malamig, naisipan ng langit na i-regalo sa akin ang panaganip ng panaginip. Dito, sinalubong kita sa bintana ng aming sala. Naka-ngiti kang pumasok na parang matagal ka nang uma-akyat bahay, na parang sine ito at ikaw ang bispren kong kasya sa bintana ng aking kuwarto.

Kunwari'y galit ako sa iyo dahil sa tagal kong paghihintay dito para sa iyo, napawi ang tampo sa saglit na pagtagpo ng ating mga mata.

Naglakad tayo palabas ng bahay, sa mundo ng pansamantalang takipsilim, at nagusap, nagtawanan at napalapit.

Ngunit napunta tayo sa isang malaking kuweba, sa kabilang dulo nakatayo ang ating mga kalaban. May ilang sandaling lumipas, sa kanilang tingin nakalakip ang hamon, at nang walang imik kanyang-kanyang sinimulan ang ritwal na hudyat ng bakbakan.

At saka nagtapos ang palabas ng aking mithiin, nagsara ang tanghalan at bumukas ang aking mata sa mundo kung saan iisa lang ang salita para sa pangarap at panaginip.